ازاي بيتكون نمط التعلق ( نمط التعلق القلق )

 

في المقال اللي فات اتكلمنا عن ازاي بتتكون نمط التعلق الامن الصحي وفي المقال ده هتكلم عن ازاي بيتكون انماط التعلق غير الامن ( القلق - التجنبي - القلق التجنبي ) 

في المقال اللي فات قولنا ان بيحصل تلبية الاحتياجات النفسية بشكل سليم وهنا بقى بيحصل العكس وبتكون الاحتياجات النفسية غير مشبعة أو مش متلبية بشكل سليم فبيحصل ايه بقى  بيبدأ تيجي فكرة اني عايز اضمن وجود الأمان والقبول والحب بشكل مستمر وده بيحسسني طول الوقت اني مش حاسس بالأمان والقبول والحب بشكل كافي وببقى عايز اضمن من وجودهم بشكل مستمر عشان اكون مطمن اني تمام وبالتالي ده بيحول الاحتياجات دي رغبة ملحة جوايا بفكرة مسيطرة اني حياتي مش هادية ولا مستقرة من غيرهم وبالتالي بيستحوذوا على تفكيري اغلب الوقت وهنا بتيجي الاعتمادية على الآخرين بشكل قوي اوي لدرجة ان حياتي ممكن تقف من غير وجود الشخص اللي بعتمد عليه في تلبية احتياجاتي في الامان والقبول والحب وبسبب فكرة الضمان والاعتمادية ده بيخلي الشخص يروح في ٣ اتجاهات 

الاتجاه الاول اني عايز اضمن طول الوقت وجود الشخص ( نمط التعلق القلق )

الاتجاه التاني اني تعبان من فكرة الضمان والاعتماد وهنا بقرر البعد والاعتمادية العالية على نفسي والاستغناء عن الناس ( نمط التعلق التجنبي ) 

الاتجاه التالت اني عايز اضمن وجود الشخص واعتمد عليه وفي نفس الوقت خايف من فكرة انه يمشي وعشان اريح نفسي بعد ما بدخل العلاقة بقرر ان انا اللي انهيها بنفسي ( نمط التعلق القلق الجنبي ) 

وفي المقال ده هبدأ بنمط التعلق القلق 

طيب نمط التعلق القلق ده شكله ايه وبيخليك تتصرف ازاي فس حياتك تعالي اقولك 

1- بيحتاج دايما انه يبقى مطمن لوجود الشخص المعتمد عليه ومطمن بوجوده بشكل مستمر بمعنى انه عايز طول الوقت يكون على طول على تواصل مع الشخص ده على مدار اليوم وان لو الشخص اختفى شوية لأي سبب يبدأ يقلق ويتوتر والدنيا تقف عنده لحد ما يظهر تاني وهنا هتقولي بس انا بكون في شغلي أو مع اصحابي وحياتي مش بتقف اوي يعنى هقولك بتمارس يومك اه بس وانت مش مركز وتفضل كل شوية تبص في الموبايل وبتبقى مسحوب لحد ما يجيلك رسالة منه أو مكالمة 

2- بيحتاج دايما يسمع كلام زي اطمن وانا موجود وانا بحبك وانا كمان مقدرش استغنى عنك وانت مميزاتك عندي كذا وكذا عشان يفضل مطمن ان الشخص ده هيفضل موجود ومش هيمشي وفي في الوقت كلام الشخص ده بيطمنه انه لسه مقبول ومحبوب عند الشخص ده وانه مش مرفوض لانه بيكون عنده خوف قوي من الوحدة والهجر والرفض 

3- بيحتاج دايما ان الشخص المعتمد عليه يفضل بنفس طريقته واسلوبه معاه عشان اي تغيير في الطريقة أو المعاملة أو الأسلوب ممكن يترجم على انه بطل يحبه أو بدأ يرفضه أو بيفكر يمشي عشان كدة بيكون حساس جدا لأي كلمة بتتقال أو تصرف بيتعمل عشان ممكن يفكر ان المشكلة فيه هو وان الشخص المعتمد عليه كدة هيمشي أو رافضه وطبعا مش محتاج اقولك ان كل ده مسمع من الطفولة 

4- محتاج دايما يحس انه رقم واحد عند الشخص المعتمد عليه وانه مش شايف غيره حتى لو معبرش عن ده فتلاقيه دايما مثلا بيغير من أصحاب الشخص المعتمد عليه لأنه بيعتبرهم منافسين ليه في علاقته بيه انهم ممكن يخده منهم وينشغل عنه بيهم ان والوقت اللي الشخص المعتمد عليه مع أصحابه هو أولى بيه منهم 

5- بيكون محتاج انه يدوب عاطفيا في الشخص المعتمد عليه وانه يتغرق حب وعاطفة وكلام حلو وكلام جميل يطمن وانه يشوف ان الشخص المعتمد عليه دايما بيراعي احتياجاته بشكل مستمر وانه دايما شايفه وسامعه 

6- محتاج بشكل مُلح انه يعرف تحركات الشخص المعتمد عليه عشان يبقى مطمن عشان اشهر جملة الشخص المتعلق بيقولها للشخص المعتمد عليه جملة متسبنيش لدماغي لما تختفي أو يكون عندك حاجة بتعملها عشان بقلق جدا عليك وفي الحقيقة الاختفاء ده بيترجم عنده هو ممكن يمشي ويسبني عشان كدة دايما توقعاته كارثية وان في مصيبة حصلت أو هتحصل 

7- وجود الشخص المعتمد عليه يعنى يساوي وجوده عشان هو بيستمد قيمته الذاتية من وجود الشخص ده أو من العلاقة عموما عشان كدة احيانا بنسمع جملة ان هو اللي حسسني ان ليا لازمة أو انه حسسني بقيمتي أو حسسني اني موجودة في الحياة وان ليا حياة بعيشها وبخلاف ذلك يبقى ملوش لازمة ولا قيمة 

8- والنقطة دي الأخطر على الإطلاق ليه بقى عشان يضمن وجود الشخص ده على طول في حياته بيكون سلوكه اغلب الوقت ارضاء الآخر وانه يجي على حساب نفسه عشان خاطر الشخص ده ويقدم تنازلات كتير عشان يضمن ويحافظ على وجوده وهنا ممكن يحس بالاجهاد وانه بيخسر نفسه عشان اللي بيقدمه وفي نفس الوقت مش قادر يتعامل في العلاقة دي بشكل بشكل صحي كفاية أو حدود سليمة 

9- من اكتر المشاعر المؤلمة للشخص المتعلق شعور الفقد وبيحاول دايما يتجنبها قدر الإمكان وتاني مشاعر مؤلمة بالنسباله شعور الخذلان عشان كدة ممكن مع الوقت يتحول لنمط التعلق التجنبي وده هنتكلم عنه المقال الجاي ان شاءالله 

10- محتاج يحس دايما انه مسؤول من الشخص المعتمد عليه حتى في ابسط أمور حياته والفكرة الأخطر انه بيكون عايز الشخص المعتمد عليه شايل اغلب مسؤولياته عشان يحس انه كدة مطمن ان في حد هو ساند عليه والمرهق والمجهد اكتر انه عايز الشخص المعتمد عليه يشيل مسؤولية مشاعره واحيتاجاته وافكاره وحل مشاكله وهنا يكمن دور الضحية اللي مستني دايما المنقذ ودايما اغلب كلامه انا عايز حل أو عايز حد يحل 

لو انت بتعاني من نمط التعلق القلق هسيبلك هنا رابط دليل علاج نمط التعلق القلق 

دليل علاج نمط التعلق القلق 

ولو لسه ماشوفتش المقال الاول عن ازاي بيتكون انماط التعلق وشكل التعلق الامن هسيبلك الرابط هنا تشوفه 

ازاي بيتكون نمط التعلق وشكل التعلق الامن 

شاركه على فيسبوك شاركه على تويتر شاركه على جوجل بلس

عن محمد راشد