الحقيقة المرة ..
عشان تقنع وتأثر صح لازم تعرف ايه اول حاجة العقل بيشتغل بيها
حصل معاك قبل كده وانت بتتكلم مع حد قالك لخص وهات من الاخر انت عايز ايه ؟؟
او يقولك لالالالالا انا عايزك تحكيلى تفاصيل كتير فى الموضوع ده عشان نفكر فيه كويس ونطلع بأحسن وافضل حاجة ؟؟
او يسخر منك او بطريقة غريبة كده يقولك انت مش شايف ان ديه فكرة قديمة شوية ومفهاش اختلاف ؟؟
او يبدأ يسألك عن مين من صحابنا او معارفنا هيكون موجود معانا فى الموضوع ده ؟؟
طيب وهو ايه اللى بيخلى اللى قدامك بيفكر بالطريقة ديه او يبدأ كلامه معاك بالافكار ديه او اللى شبها ؟؟
تعالى نعرف مع بعض كده وتتخيل نفسك فى كل المواقف اللى كنت فيها سواء خسرت الحوار او نجحت فيه حتلاقى اللى بيحصل دلوقتى
ببساطة كده انت عشان مقنع جيد ومؤثر فى الناس لازم تشتغل على اول حاجة العقل بيبدأ التفكير بيها وهنا بقى بيجي دور القيم المحورية اللى اتكلمنا عنها في المقال اللى فات
من غير فلسفة عميقة وكلام كبير بيتقال هو عربي صحيح بس تحس انه محتاج ترجمة او تكون دارس طب نفسي او حتى الترشيح للمخ احنا عايزين نتكلم مع بعض فى صميم الموضوع
وصميم الموضوع بيقول ان فى 4 قيم اساسية موجودة فى كل البشر بس موجودين بنسب بأختلاف ترتيبهم طيب يعنى ايه الكلام ده
حقولك ياسيدى
القيم المحورية اللى عند البشر كلهم هما ( النتائج - الاتقان والجودة - الامان والضمان - التميز والابداع ) يعنى وانت بتتكلم مع اى حد هتلاقيه عشان يكمل معاك الموضوع يحس بوجود قيمة من دول عشان يبدأ يتفاعل معاك شطارتك انت بقى انك تكتشف ترتيبهم عنده من خلال مقدمة لذيذة جدا للشخص اللى قدامك
ايه رايك انا عايز اتكلم معاك فى موضوع تحب اقولك نتائج الموضوع ده ايه وبناء عليه نقرر كلام فيه ولا لاء ولا تحب اقولك ازاى الموضوع ده حيتعمل بأفضل طريقة ولا اقولك الاول ضمانات الموضوع ومين معانا فيه كمان ولا تسمع بنفسك تميز واختلاف الفكرة
وسيب الشخص اللى قدامك هو اللى يرتب القيم المحورية بنفسه وبناء على كده انت ابدأ معاه الحوار حتكتشف انك بتختصر مجهود كبير جدا فى طرح موضوعك للشخص اللى قدامك ونفس الوقت المقدمة اللى عملتها عملت حاجة مهمة جدا وهى التشويق انه يسمعك والتشويق هنا يعنى انه يتهيئ نفسيا انه يسعمك
تخيل نفسك فى الموقف ده وانت بتعمل السيناريو وسامع انت بتقول ايه ومدى استجابة الشخص اللى قدامك ليك فى الحوار بشكل مبدئي
عايزك من اللحظة تبدأ فى تطبيق افكرة ديه وعايزين نكون على تواصل مع بعض ونحلل مع بعض مدى نجاحك فى بداية كلامك بالطريقة طريقة القيم المحورية اللى بيبدأ العقل بيها فى التفكير فى اى موضوع
وخلى بالك فى المقال الجاى ان شاء الله حنتكلم على حاجة مهمة جدا حتتكلم بيها بعد القيم المحورية اللى عند الشخص عشان تبقى فاهم ازاى بتتعامل مع النفس البشرية والعقلية اللى قدامك بأحتراف
للتواصل مع المدرب محمد راشد على حساب فيس بوك
https://www.facebook.com/engmohamed.rashed1
او من خلال الصفحة
https://www.facebook.com/Tr.MoHaMeD.RaSHeD
0 التعليقات:
إرسال تعليق