اتكلمنا فى المقال اللى فات عن الناس اللى بتجرى ورا خوفها بحجة الهد والطموح وانها بتدخل فى خلاط الحياة والنهاردة ان شاء الله هنتلكم عن خطوات بسيطة مش هقول سحرية وخطيرة فى نفس الوقت هقولك على قد ما هى بسيطة هى فعالة جدا ركز ونفذ واحدة واحدة عشان فى وقت وجيز تحس بالانجاز والتغير فى حياتك وانت بتدى لنفسك كل يوم وقت يتجمع على بعضه فى النهاية تلاقى التغيير. --- فى 7 خطوات للخروج من الخلاط.
الخطوة الاول : كبش فداء
لازم تعرف ان فترة انتقالية ليك ى نقلة فى حياتك فلازم يكون ليها مقابل النقلة الجديدة فى حياتك وحتكون عبارة عن وقت ومجهود وفلوس وفى نفس الوقت ده ممكن يجي على حساب حد فى حياتك خصوصا لو انت تمتلك اسرة والنقلة ديه لازم يكون بالتنسيق مع الاسرة ويكون قرارى جماعى متفق عليه من الاسرة.
الخطوة التانية : مزق دفاترك القديمة
فى حاجات كده فى حياتك لو فكرت مع نفسك شوية هتلاقيها هى اللى موقفة حياتك شوية وبتاخد منك وقت ومجهود مهدر زى الحفاظ على علاقات معروف نهايتها ايه وانت بتعافر فى المحافظة عليها او شغل انت انه مش بتاعك ومع ذلك متمسك بيه انك تكون محتفظ بكتب قديمة وانت متأكد من جواك انك مش هترجعلها بس لمجرد الاحساس بالامتلاك هى عندك مع انك لو فكرت هتلاقى انك مش عارف تقرا حاجة جديدة بسبب فكرة انك ممكن ترجع تعيد قراءة القديم تانى الخلاصة تخلص من الاشياء المعلقة فى حياتك.
الخطوة التالتة : المكالمة البريئة
انك تتكلم مع نفسك بطريقة مختلفة بطريقة فيها توافق يعنى تقول لنفسك وتبرمج عقلك على الحياة الجديدة اللى انت عايز تعيش فيها ليه بقولك كده عشان احنا احسن ناس نتكلم مع نفسنا بشكل ايجابي رائع جدا وبعد فترة بتلاقى نفسك معملتش حاجة ليه عشان بعد ما بتقول الكلام الايجابي الرائع ده لسه جواك كام فكرة مسيطرة عليك بتوقفك يعنى مثلا تقول انا هعيش هادى فى حياتى وبسلام بأيمانى برنا سبحانه وتعالى وبعدها تقول بس ازاى انا اصلا بتعصب من اقل فكرة .. لانك بتحط الفكرة وعكسها فى نفس اللحظة ولو حابب تتوسع وتقرأ فى الموضوع ده ممكن تقرأ كتاب قوة العزيمة لوين داير
الخطوة الرابعة : اياك .. اوعى تبدأ بالتخطيط
فى الغالب الناس فى المرحلة ديه بيكون حماسها او احباطها بيكون هو محركها تجاه شغفها بمثالية وديه المشكلة الاكبر انك تقول لنفسك انك لازم بقى تبدأ تخطط لكل خطوة فى حياتك فتلاقى نفسك خدت سنتين تلاتة تخطيط ومخدتش خطوة واحدة فى حياتك ويبقى ولا بتعمل القديم ولا الجديد وتلاقى نفسك فى الاخر زهقت ورجعت تعمل السلوكيات القديمة تانى
الخطوة الخامسة : سنة اولى
كلنا فاكرين واحنا رايحين المدرسة اول يوم فى اولى ابتدائي بنكون فرحانين وكلنا شغف اننا نتعرف على المدرسة والحياة الدراسية بنفس الطريقة انا عايزك تعمل كده تعمل السلوكيات الجديدة وانت كلك شغف انك تتعرف على الحياة الجديدة ديه يعنى مش لازم تبقى عارف كل حاجة وفاهم كل حاجة وكل خطوة انت ماشي فى حياتك فيها لانك تقريبا فى المرحلة ديه مش هتكون قادر على رسم رؤيتك سيب نفسك للشغف وخد الخطوة الاولى ايا كانت المهم انك تبدأ تتحرك وديه سنة الكون القائمة على التغير والحركة وانك تجرب حاجات جديدة منكتش بتفكر فيها او حتى حابب تسمع عنها وديه اللى هتنقلك للخطوة الجياة
الخطوة السادسة : الهرم الرابع
الهرم الرابع هو احد احدث الابحاث فى هيئة الاثار واللى جارى البحث عنه حاليا من كل دول العالم وبنفس الطريقة وانت بتجرب حاجات جديدة عليك فى حياتك وديه بالنسالنا مرحلة البحث عن الهرام الرابع انت بتكتشف دورك فى الحياة ووموهبتك وشغلك كمان اللى تبدع فيه وحتكون قدرت ترسم صورة لحياتك الجديدة بأكتشاف نفسك من جديد واكتشاف متعتك فى الحياة وهنا هتكون قدرت تتحرر من جزء كبير من الماضى بتاعك.
الخطوة السابعة والاخيرة : شمس الحياة
الشمس بطبيعتها مشعة بالنور وبتدى احساس بالبهجة والامان بوجودها وفى نفس الوقت لو حد قرب منها بفهمه للشمس وطبيعتها هيعرف يتعامل معها انما اللى هيقرب للشمس بغشامة هتكون النتيجة الحرق بنفس الطريقة انت كمان بتكون شمس ازاى !! انك هتكون شخص مشع بالنور والسعادة والحب وبالتالى اللى فاهم الطبيعة ديه هيكون من ضمن المقربين ليك انما اللى بيقرب بغشامة باللى انت عملته فى الخطوات السابقة هتكون اكتسبت حاجة مهمة جدا هى الحصن النفسي يعنى مفيش حاجة سلبية تأثر عليك وده مش معناه ان حياتك هتكون بلا مشاكل بس فى فرق كبير جدا من انك تقابل مشكله وتضغط منها وتتوتر وتستنذف عاطفيا وانك تبقى عارف ان حياتى الجديدة بقت بتسمحلى بتقبل المشاكل والتعامل معها بحكمة. وهنا تكمن قوة الشمس العطاء بلا حدود مع وجود حدود للاشياء المتطفلة على حياتى.
0 التعليقات:
إرسال تعليق