#هو_قرارك_ولا_قرار_الناس_؟؟
عادتا واحنا بنتعامل مع الحياة وفى الحياة بنلاقى نفسنا حاجة من اتنين اول حاجة بناخد قرارت بنفسنا ولنفسنا ومش بنهتم لرأي الناس خالص اللى حولينا او بناخد القرار من الناس اللى حولينا
زى مثلا بنت لما تحب تشترى لبس فى بنت بتنزل وتختار وتقرر وفى بنت تانية ممكن تروح المحل ب 7 اصحابها يقررلوها تشتري ايه
طيب حاجة زى ديه ممكن ليها مميزات وعيوب ؟؟
طيب قبل ما نعرف هي ميزة ولا عيب عايزين نعرف ده بيحصل ازاى اصلا والمسؤل عنه لان ده سؤال محير بالنسبة لناس كتير هل المسؤل عن كدة شخصيتنا ولا افكارنا ولا تربيتنا
ببساطة فى جزء مهم جدا من الصحة النفسية بنتكلم عنه اسمه البرامج العقلية وديه بتكون عبارة عن طرق لادراك المعلومات اللى برنامج منهم برنامج القرار اللى بيقسم الناس لنوعين
النوع الاول الشخص الداخلى – صاحب شعار صوتى من دماغى
وده شخص بيعتمد على نفسه تماما فى القرار وبياخد كل قراراته لنفسه وده الشخص اللى ممكن يروح للناس يقولهم انا خدت القرار وبقولكم عليه بس
ميزة الشخص ده طبعا القدرة على اتخاذ القرار بسهولة
عيب الشخص ده انه متمسك برأيه جدا وصعب يغيره
النوع الثاني الشخص الخارجي – صاحب شعار انا مش بعرف اخد قرار
والشخص ده بيعتمد على اراء الاخرين دايما فى القرار وممكن تلاقيه بيشتكى انه مش بيعرف ياخد قرار بنفسه
ميزة الشخص ده المرونة انه يسمع كل الاراء ويتأثر بيها
عيب الشخص ده انه بيتأثر باللى حوليه جدا وكثرة الاراء بتبقى حاجة محيرة جدا بالنسباله
طيب الحل ايه والعلاج ايه
انت لو من النوع الاول لازم تجبر نفسك شوية وتدرب نفسك على انك تسمع وتفكر فى اللى بتقوله الناس جايز يكون فيه جزء من الصح محتاج تاخد بالك منه
انت لو من النوع التانى اسمع اراء الناس وابدأ بتدريب نفسك انك تفكر فى اللى سمعته وتطلع منه بقرار وتشتغل عليه واعرف انك مش هتخسر حاجة ومفيش حاجة تستاهل انك تخاف منها
0 التعليقات:
إرسال تعليق