تنويــــــــــه !!
قبل ما نتكلم على ال 9 علامات وندخل في الموضوع عايزك تعرف 3 حاجات
الحاجة الاولى : ان مش شرط يكون فيك ال 9 علامات ممكن يكون عندك علامة او علامتين او 3 علامات حتى عشان تجذب الشخصية النرجسية
الحاجة الثانية : العلامات ديه هي الثغرات اللى لو الشخصية النرجسية وهو بيتعامل معاك شاف فيك ولو واحدة منهم هيستغلها كويس جدا وهنقول مثال عليها في الاخر بعد ما تقرأ العلامات
الحاجة الثالثة : وديه مهمة جدا وركز فيها
بعد ما تقرأ وتشوف العلامات لو فيك لحد 4 علامات من ال 9 يبقى انت محتاج تراجع طريقة تفكيرك في نفسك وثقتك وتقديرك الذاتي لو وصلت لحد 5 علامات يبقى انت قربت من الاضطرابات الشخصية وفي الحالة ديه انت محتاج تشتغل على نفسك او تستعين بحد متخصص يساعدك ولو وصلت لحد 6 علامات واكتر يبقى انت فعلا محتاج حد متخصص يساعدك
العلامة الاولى : الخوف من الهجر
اي حد عنده الفكرة ديه ممكن ببساطة يتنازل عن حاجات كتير جدا في مقابل ان يستمر في علاقة ممكن تكون سامة او مؤذية جدا ليه وبالتالي بيضطر انه ويعمل حاجات لارضاء الطرف الاخر حتى لو الحاجات ديه ضد اللى هو مقتنع بيه اياً كان
العلامة الثانية : تقلبات الحالة العاطفية
بمعنى انه ممكن دلوقتى تكون مبسوط وسعيد وفرحان وبتعامل الطرف الاخر بشكل هو نفسه ميصدقوش وبعد شوية تاخد قرار بكره الشخص ده وممكن تعمله بلوك وتبقى مش عايز تعرفه تاني وبعد شوية تفك البلوك وهكذا
العلامة الثالثة : عدم استقرار الهوية
يعنى تلاقي نفسك شوية عايز تبقى ملتزم ومتدين وشوية شاب كول وفانكي والحياة حلوة ونفس الكلام في البنت شوية عايزة تبقى محجبة وترضي ربنا وشوية عايز تلبس على الموضة وتبقى الحياة لطيفة .. ببساطة كدة انسان مش عارف هو عايز ايه اصلا ولا عارف هو المفروض يشوف نفسه ازاى
العلامة الرابعة : التهور والاندفاع
وهنا بقى انت بتشوف نفسك ان عقلك مش موجود اللى بيجي على دماغك اياً كان هو ايه بتعمله حلو او وحش ايجابي او سلبي مش فارقة وجملة مش فارقة ديه بتقولها كتير ارضاءاً لفكرة الغاء عقلك وعشان متحسش بالذنب اللى انت اصلا حاسس بيه وبتحاول تهرب منه
العلامة الخامسة : الفصلان من الواقع
ان يجي عليك وقت كدة تبقى فاصل فيه من كل حاجة تايهه مش مركز مش عارف انت فين ولا بتعمل ايه ولا مع مين ولما تستعيد تركيزك مرة تانية لما حد يكلمك او لما يحصل حاجة تفصلك عن الفصلان ده بتسأل نفسك هو انت كنت بتعمل ايه
العلامة السادسة : الميل للاذية
والاذى بشكل نفسي او بدني بيكون رسالة للطرف الاخر متسبنيش او تبعد عني وممكن يكون الاذى ده زي حرمان من الاكل مثلا او الحروج السطحية بالجسم او في بعض الاحيان للانتحار
العلامة السابعة : الاحساس بالخواء
يعنى انك تكون شايف نفسك فاضي من جواك ومش حاسس بقيمتك واغلب الوقت بتكون حاسس بالزهق والملل وبدور على اي حاجة تعملها تملى الفراغ ده وهنا يكمن الخطر عشان ممكن تتصرف تصرف متهور لمجرد انك تكسر الروتين ده
العلامة الثامنة : نوبات الغضب
انك لما بتتعصب مش بتكون مجرد عصبية عادية لاء ديه بتقلب بغضب شديد وممكن توصل للتكسير والتدمير عادي جدا وبتتصرف بدون وعي وبيكون كل تركيزك انك تفرغ شحنة الغضب ديه من غير ما تحسب عواقبها على نفسك او على غيرك
العلامة التاسعة : فقدان الاعصاب في حكمك على الاشياء والاخرين
وهنا انت بتلغي تفكيرك وبتشخصن الامور وبتشوف ان ابسط حاجة بتحصل هي المقصود منها انها تضايقك سواء عملت حاجة ومطلعتش زي ما انت متخيل او حد عمل رد فعل مش زي ما انت متوقع
وبكدة نكون خلصنا العلامات التاسعة .. طيب وده ايه علاقته بالشخصية النرجسية
عشان ببساطة كدة العلامات ديه ثغرات للشخصية النرجسية للسيطرة عليك وفرض شخسيته عليك واستغلالك وزي ما قولتلك هشرحلك مثال يوضح الفكرة
لو انت عندك فكرة الخوف من الهجر والشخص اللى قدامك نرجسي وفهم النقطة ديه هيلعب عليها كويس جدا خصوصا ان من علاماته حب السيطرة على الاخرين وانت بكدة بتسمحله انه يسيطر عليك بسهولة
وهكذا فى كل علامة في اللى اتكلمنا عنهم هتلاقي الشخص النرجسي بيفهمها وبيستغلها لصالحه كويس جدا لان طبيعة صفات شخصيته عكس العلامات والصفات ديه
صح جدا
ردحذف